Career Fair - 2023, Faculty of Arts, University of Jaffna

Career Fair - 2023, Faculty of Arts, University of Jaffna

This has been organized under the World Bank funded project ELTA-ELSE, FDP, AHEAD, where I have served as project coordinator to prepare and execute this project in the University of Jaffna from 2019 - 2023.

யாழ். பல்கலைக்கழக கலைப்பீட மாணவர்களுக்கான உள்ளகத் தொழில்சார் பயிற்சிகளை வழங்க முன்வரும் நிறுவனங்களை அடையாளங்காணும் நோக்குடனும், யாழ்ப்பாணப் பல்கலைக்கழகக் கலைப் பட்டதாரிகளுக்கான நிரந்தரமான மற்றும் தற்காலிக, முழுநேர மற்றும் பகுதிநேர வேலைவாய்ப்புக்களுக்கான வாய்ப்புக்களை அரச மற்றும் தனியார் நிறுவனங்களிடமிருந்து பெற்றுக்கொடுக்கும் இலக்குடனும் யாழ். பல்கலைக்கழகக் கலைப்பீட மாணவர்களுக்கான ‘தொழிற் சந்தை 2023 - Career Fair 2023’

முதற்தடவையாக நேற்று - 3 ஆம் திகதி, வெள்ளிக்கிழமை கலைப் பீடத்தில் நடைபெற்றது. உலகவங்கியின் நிதியுதவியிலான ‘மேன்மைப்படுத்தல் மற்றும் அபிவிருத்தி ஊடாக உயர்கல்வியைத் துரித வளர்ச்சிக்கு உட்படுத்துதல்’ (எகெட்) திட்டத்தின் உதவியில் இத் தொழிற்சந்தை நிகழ்வு இடம்பெற்றது.

நாடாளவியரீதியில் அமைச்சுக்கள், அரச திணைக்களங்கள், சபைகள், தனியார் வங்கிகள், நிதி நிறுவனங்கள், விருந்தோம்பல் துறையைச் சேர்ந்த நிறுவனங்கள், ஹோட்டல்கள், உயர்கல்வி நிறுவனங்கள், தனியார் பாடசாலைகள், உள்ளூர் மற்றும் சர்வதேச அரச சார்பற்ற நிறுவனங்கள் மற்றும் தனியார் தொழிற்துறையினர் என 65க்கும் மேற்பட்ட நிறுவனங்கள் இத் தொழிற்சந்தையில் பங்கேற்றன.

‘தொழிற் சந்தை 2023’இன் தொடக்கவிழாவில், யாழ். பல்கலைக்கழகத் துணைவேந்தர் பேராசிரியர் சி. சிறிசற்குணராஜா பிரதம அதிதியாகக் கலந்துகொண்டு நிகழ்வை ஆரம்பித்துவைத்தார். இந்நிகழ்வில், கலைப் பீடாதிபதி பேராசிரியர் எஸ். ரகுராம், யாழ்ப்பாண மாவட்ட மேலதிக அரசாங்க அதிபர் எம். பிரதீபன், உலக வங்கியின் “எகெட்” நிகழ்ச்சித் திட்டத்தின் கலைப்பீட இணைப்பாளர் சிரேஷ்ட விரிவுரையாளர் எஸ். கபிலன், எகெட் தொழில் வளப் பயிற்சிகளுக்கான கலைப்பீட இணைப்பாளர் சிரேஷ்ட விரிவுரையாளர் எஸ். சிவகாந்தன், ‘தொழிற் சந்தை 2023’ இற்கான வழிகாட்டுநர் சிரேஷ்ட விரிவுரையாளர் எல். ரமணன், அரச சார்பற்ற நிறுவனங்கள் சார்பில் ‘சொண்ட்’ நிறுவனப் பணிப்பாளர் எஸ். செந்தூர்ராஜா ஆகியோர் உரையாற்றினர்.

யாழ். பல்கலைக்கழகக் கலைப்பீடத்தில் நான்காம் வருடம், மூன்றாம் வருட சிறப்புக்கலை மற்றும் பொதுக்கலை பயிலும் மாணவர்களும், யாழ்ப்பாணப் பல்கலைக்கழகத்தில் சிறப்புக்கலை, பொதுக்கலைப் பட்டங்கள் பெற்று, வேலை வாய்ப்புக்களுக்காகக் காத்திருக்கும் பட்டதாரிகளும் நேரடிப் பயனாளிகளாக இந்தத் தொழிற்சந்தையில் பங்குபற்றியிருந்தனர்.